АЛБАСТЫ
зат есім. 1. мифологиялық. Түркi халықтарының ауыз әдебиетінде кездесетін мифтік бейне, ескi наным бойынша әйел бейнесіндегi жын, перi, марту секілдi қара ниеттi, қас күштің иесi. 2. Кiсi тектес, бүкіл денесін түк басқан мақұлық (гемоноид). 3. ауыспалы мағына. Мысы, күшi, жыны басып, арқасы ұстайтын, арбап алатын қасиет. 4. ауыспалы мағына. Бiр нәрсенi үрейлендіріп, қорқытып өзіне бағындырып алған адам. 5. ауыспалы мағына. Сүйкімсіз, сұмпайы, жексұрын, оңбаған адам. 6. а уыс. Зұлымдық, жауыздықтың көзi. Албасты басқандай. Делсал болып, дегбірi қашып, өз еркінен айырылғандай. Албасты [ қара албасты ] басқыр [ бассын ]. қарғыс сөз. Қара басқыр, қырсық шалғыр деген мағынада. Албасты басты. Мифтік түсінік бойынша шайтан, жын, перi адамға қонып, қинады. Албастысын арттырды. Мысы басты. Албастысы ұстады. Жыны келдi, ашу қысты, аяқ астынан ашуланды.