ЖҰТ
зат есім. Ауа райының қолайсыздығынан болатын экономикалық күйзеліс, апат; жазғы қуаңшылық пен қатты қыстан аштыққа ұшыраушылық, ашаршылық. Жұт болды. Қыс қатты болып, мал жұтады, аштан қырылды. Жұт жеті ағайынды. Жұт жалғыз болмайды, басқа да қиыншылықтармен, табиғат апаттарымен қабаттаса жүреді деген мағынада. Жұт жылғы. Жұт, апат, қатты қыс болған жылғы. Жұтқа жаға жыртқызбады. Жұтқа жеңдірмеді, малжанды аман сақтады, мұртын шалдырмады. Жұт құрығынан құтылды. Жұттан аман қалды. Жұттан шыққан жұрындар. Жұттан аман қалған кедей-кепшік. Жұттың жұты. Барып тұрған әлемет. Жұт хабаршысы. Табиғаттағы аса қолайсыз құбылыстарды (жаздағы аса құрғақшылық, қыстағы қардың шектен тыс қалың болуы, індет) жұттың жұттық белгісі деп санау. Жұт шақырады. Аса қалың қар мен боранның аяғы жұтқа айналады.