ЖЕМІС
зат есім. 1. Ағаштар мен сабақты мәдени және жабайы өсімдіктердің басына шығатын өнімі, миуасы. 2.биологиялық. Гүл аналығының жұмыртқа жасушасы ұрықтанғаннан кейін түзілетін жабық тұқымды өсімдіктердің көбею мүшесі. 3. ауыспалы мағына. Бір нәрсенің нәтижесі, қорытындысы. 4. ауыспалы мағына. Ырыс, несібе, ризық. Жеміс ағашы. Жеміс өндіру мақсатымен қолдан өсірілетін және жабайы (көп жылдық) өсетін ағаштар, бұталар. Жеміс бермеді. Нәтиже шықпады. Жеміс дақылдары. Жемісі, жидегі, жаңғағы үшін қолдан өсірілетін өсімдіктер тобы. Жеміс жапырақшасы. ботаникалық. Өсімдіктің түйіндейтін жапырағы. Жеміс жемірлері. зоологиялық. Екпе өсімдіктердің жемісін зақымдап, үлкен зиян келтіретін ұсақ көбелектер туысы. Жеміс көшеті. Жеміс және жидек дақылдарының тұқымынан өсірілген немесе ұластырылған екпе шыбықтар. Жеміс күйесі. зоологиялық. Жеміс ағаштарын зақымдайтын зиянды көбелек. Жемістің қоңыр кенесі. зоологиялық. Алма, шие, алхоры, шабдалы, бадам, алмұрт сияқты жеміс ағаштарын зақымдайтын кененің түрі. Жемістің қызыл кенесі. зоологиялық. Алмұрт, шие, әсіресе алма мен алхорыны қатты зақымдайтын зиянкес кене. Жеміс шыбыны. зоологиялық. < латын тілі. drоsоphіlіdаe> Қос қанаттылар отрядына жататын жәндіктердің бір тұқымдасы. Жеміс шырыны. Жеміс тіндерінде, клеткаларында және қуыстарында болатын сұйықтық. Жеміс шірігі. Mоnіlіa туысына жататын саңырауқұлақтар тудыратын жеміс ағаштарының ауруы. Жемісін жеді [ татты ]. Қызығын (пайдасын) көрді. Жемісін көрді [ көзбен көрді ]. Нәтижесі болар шаққа, жүзеге асар шаққа жетті.