ТАБАЛДЫРЫҚ
зат есім. 1. Есіктің маңдайшасына қарама-қарсы, төменгі жағындағы жерге, еденге тиіп тұратын көлденең ағашы. // Есіктің кіреберісі, ішке қарай аттап өтетін жер. 2. кен ісі. Металлургиялық пештердің әртүрлі шалаөнімдерді шығаруға арналған арнаулы бөлігі. 3. кен ісі. Шөктіру мәшинесінде тор бетіндегі заттың үстіңгі қабатындағы жеңіл фракцияны келесі камераға немесе қалдық науаға белгілі мөлшермен түсіру үшін орнатылған тетік. Табалдырығын аттады. а) Үйге алғаш рет келдi, бас сұқты, кірдi. ә) поэтикалық. Жарық дүниеге, өмірге және тағы басқа. келдi, кірістi деген мағынада. Табалдырығын аттамады. Үйіне келмей, кірмей қойды. Табалдырығын аттаттырды. Ұжым, мекеме, оқу орнына қабылдаттырды. Табалдырығын былғады. Ұятты iс жасап, айыпты болды. Табалдырығын тоздыру. Қайта-қайта бара беру. Табалдырық қазы. Аса қалың, айналдыруға келмеген өте семіз қазы; кей жерлерде табан қазы деп аталады.