СЫНАҚ
зат есім. 1. Тексеру, байқау. 2. ауыспалы мағына. Тағдыр талайы, қиыншылық, ауыр күндер. 3. педагогикалық. Жоғары және арнайы орта оқу орындары студенттерінің семинар және практикалық сабақтарда, өндірістік тәжірибеде алған білімдері мен дағдыларын, олардың өздігінен орындайтын міндетті жұмыстарын (сызған сызбаларын, шығарған есептерін және тағы басқа.) тексерудің бір түрі. 4. әскери сөз. Атомдық қаруларды тексеру, сынақтан өткізу ісі. Сынақ жүргізді. а) Емтихан алды. ә) Тәжірибеден өткізді, байқау жүргізді. Сынақ кітапшасы. педагогикалық. Студенттердің білім, білік, іскерлік дағдыларына қойылатын бағаны тіркеу кітапшасы. Сынақ мерзімі. а) Қызметкердің тапсырылатын жұмысқа, сондай-ақ ішкі фирмалық құжаттармен айқындалатын басқа да талаптарға сай келетінін тексеру мақсатымен белгіленетін мерзім. ә) советизм. Совет адамының бейнесіне нұқсан келтіретін, жаман дағдысымен көзге түскен жұмысшы, қызметкерге ұжым тарапынан берілетін байқау мерзімі. Сынақтан өтті. өзін көрсете білді, сыннан мүдірмей өтті, жетістіктерімен көрінді. Сынақты өткерді. Сыннан өтті, бастан кешірді.