САУҒА
зат есім. 1. этнографиялық. Соғыстан түскен олжадан не ауланған аңнан берілетін сый. 2. этнографиялық. Дәстүрлі қазақ қоғамындағы асыраушысы жоқтарға, кемтарларға соғыстан, аңшылықтан түскен олжадан берілетін көмек, жәрдем. 3. этнографиялық. Байырғы қазақ қоғамында қалыптасқан жеңілген жауынгердің немесе тұтқынның сұрап алған бас бостандығы, бас амандығы. 4. этнографиялық. Бас амандығын сұраушылық. 5. ауыспалы мағына. Жәрдемақы, мақсатты төлем. 6. ауыспалы мағына. Бір жолға қи, маған бер, араша деген мағынадағы сөз. Сауғаға бердi. этнографиялық. Түскен олжадан сый бердi. Сауғаға сұрады. этнографиялық. Тұтқынның жанына араша болды, босатуын тіледі. Сауға сұрады. этнографиялық. Жорықтан, аңшылықтан түскен олжадан тиесілі үлесін сұрады. Сауға сұрау. этнографиялық. Бас амандығын, бостандығын арашалау немесе жорықтан, аңшылықтан түскен олжадан тиесілі үлесін сұрау.