ДЕМОГРАФИЯЛЫҚ
сын есім. Халық санына қатысты. Демографиялық аудандастыру. Зерттеу нысаны болып табылатын аумақты демографиялық сипаттары жөнінен ұқсас аудандарға бөлу. Демографиялық болжам. жаңасөз. Белгілi бір жердегi, елдегi халықтың саны мен құрамы туралы болжамдық есеп. Демографиялық дағдарыс. жаңасөз. Әлеуметтік, экономикалық, табиғи ықпалдардың әсерінен белгілi бір аймақтағы халықтың ұдайы өсуінің тежелуi. Демографиялық даму. қоғ. әлеум. Халық санының өсуi. Демографиялық дүмпу. жаңасөз. Халық санының шұғыл да қарқынды өсуi. Демографиялық саясат. жаңасөз. Халықтың ұдайы өсуi үшін мемлекет тарапынан жүзеге асырылатын әкімшілік, әлеуметтік, экономикалық және құқықтық шаралар жүйесi. Демографиялық статистика. Халық статистикасы; белгілi бір ел немесе халықтарының санын, құрамын, орналасуын, көшi-қонын немесе оның жекелеген тобын сипаттайтын деректердi жинау, өңдеу, тіркеу және талдаумен шұғылданатын статистика саласы.