ДАҒДЫ
зат есім. 1. Үйреншіктi, сүйекке сіңген әдет, қалыптасқан машық. 2. Ұлтқа, дінге, ділге тән әдет-ғұрып, салтдәстүрге байланысты қалыптасқан машық, әртүрлi амал, әдет. 3. Мәдениетке, ахлаққа, ұлттық тәлімтәрбиеге тән әдеп. 4. педагогикалық. Оқыту, білім беру жүйесінде қалыптастырылатын білім алу, оны қорыту, пайдаланудың түрлi машықтары. 5. психологиялық. Алғашқыда саналы орындауды қажет ететін әрекеттің жаттыға беру нәтижесінде автоматты машыққа айналуы. Дағды алды. Үйрендi, көндіктi, қалыптасты, әдеттендi. Дағды алдырды. Үйреттi, әдеттендірдi. Дағды бойынша. Әдеттегіше, жайшылықтағыдай, күнделіктi қалпындай. Дағдыға айналды. а) Әдетке сіңдi, машыққа түстi. ә) психологиялық. Тәжірибе негізінде автоматтандырылған машыққа өттi. Дағдыға айналдырды. Әдет ретінде қалыптастырды, әдет қылды. Дағдыға басты. Үйренген әдетімен жасады. Дағдыға ендi. Әдетке айналды. Дағдыдан тыс. Өзгеше, әдеттегіден бөлек, басқаша. Дағды қылды. Қалыпқа айналдырды, үйрендi.