ИЕК
зат есім. 1. Жақ сүйектің астыңғы еріннен төменірек біткен сүйір ұшы. 2. анатомиялық. Қызылиек. 3. ауыспалы мағына. Кимешектің иек тұсына сай келетін бөлігі. 4. ауыспалы мағына. Өзеннің, дарияның, теңіздің т.б. арнасы, жағасы. Иек артпа [ артым, созым ] жер. Өте жақын қашықтықты білдіретін халықтық өлшем. Иек асты. Асып түсті, ілінді, жетті. Иек астында. Жақын жерде, таяу маңда. Иек астында жүрді. Біреудің шылауында болды. Иекке алды. а) Бағытқа алды. ә) Қатты қысты, қыспаққа алды; күштеді. Иек қағысты. Келісілген өзара түсінікті жайт туралы бір-біріне иектерін алға шығарып, шұлғып белгі беруді білдіретін ымишарат. Иек қақты. а) Ат басын изеп-изеп екілене жүрді, басын шұлғыды. ә) Белгі берді, ымдады, мегзеді. б) Сәлемдескенін, амандасқанын білдіріп, иегін көтерді. в) Жан тапсырар алдында ықылық атқан оқыс қимыл жасап, белгі берді. Иек сүйеді. а) Иегін қойып, демалды. ә) Сенді, арқа тұтты. б) Жалғасты, жанасты, тірелді. в) Жуықтады, жақындады, таяды. Иек тіреу. Сүйену, арқа тұту. Иегін көтерді. а) Бір нәрсе туралы белгі бергенде, жұмсағанда иегін алға шығара, иек қағып білдіретін қимылишарат. ә) Бәлсінді, қадірін арттырды. Иегін сақылдатты. Қалш-қалш еткізді, тоңдырып жіберді. Иегінен тағалы ат тайып жығылғандай. Қылау, сақалы жоқ, беті жып-жылтыр, көсе. Иегі иегіне тимеді. а) қалш-қалш етіп дірілдеді, қалтырады. ә) Кемсеңдеді. Иегі кемсеңдеді. Өксік қысты, жыламсырады. Иегі қышыды. Дәметті, дәмеленді, үміттенді. Иек артым [ созымдай ] жер. Жап-жақын, бір қыр астындағы жер. Иек артты. а) Асылды, сүйенді. ә) Көтерілді, жетті, асты. б) Жалғасты, созылды; жақындады, жуықтады. в) Сенді, арқа сүйеді.