ТЫРНАҚ
зат есім. 1. Аяққолының ұшындағы қатты және өткір өсінді. 2. Аңның, құстың аяқтарындағы үшкір, имиген мүйіз түзімді өткір өсінді. 3. Мұзда және мұздақты беткеймен өрмелегенде аяқтың тайып кетпеуіне қажетті альпинистердің аяқкиіміне бекітілетін арнайы жабдық. 4. ауыспалы мағына. Басқа түскен жағымсыз жағдай, біреудің үстемдігі, жәбірі, қорлығы деген мағынада. 5. Шананың табаны мен үстіңгі тақтайдың арасындағы қысқа тіреу ағаштар. 6. Шамның шынысын кигізетін жері. 7. Үйдің сыртын жаңбыр шаймас үшін төбеден салған қамыс, қарағай. 8. Үйдің іргетасы. Тырнағына алмады. Түкке жаратпады, менсінбеді. Тырнағынан садаға кетті. Татымады, біреумен салыстырғанда, оған лайық болмады, теңдес келмеді. Тырнағынан шыға алмады. Азабынан құтыла алмады. Тырнағына тұрмады [ татымады ]. Деңгейіне келмеді, лайықты болмады. Тырнағына түсті [ ілікті ]. Қармағына ілінді, тұтылды. Тырнағын батырды [ бүрді ]. а) Зорлық көрсетті, күштеді, үстемдік жасады. ә) Жаралы етті; аямады. Тырнағын салды. Бүрді. Тырнағы саусағына жабысты [ мұқады ]. Қартайды, денесі солды. Тырнағы ілікті. Бір нәрсеге қолы жетті. Тырнақ астынан кір іздеді. Бәле қуды, жаманшылық іздеді. Тырнақ астынан кір іздеуші. Бәле іздеуші, жаманшылық қуған адам. Тырнақ көбесі. Аяққолдың басындағы қатты өскіннің етке жабысқан жері, тырнақ пен еттің арасы. Тырнақ іліктірді. Қол жеткізді.