САЙТАН
1омоним [ араб тілі. ] зат есім. 1. Діни ұғым бойынша, адамзатқа қас жын-пері, шайтан. 2. ауыспалы мағына. Оңбаған, жексұрын адам. 3. ауыспалы мағына. Ұшқалақ, жеңілтек кісі, қыз, әйел. 4. ауыспалы мағына. Адамды азғырушы, кесірін тигізуші. Сайтан билеген. Бойына жын ұялаған. Сайтан биледi. Бойына жын ұялады, айтқанға көнбедi. Сайтанға беттен сүйгізді. Бойын сайтан биледі, жыны қозды. Сайтанға мойнын иген. Бойын сайтан билеген, жын-пері ұялаған. Сайтан [ шайтан ] кісі [ қыз ]. а) Мінезі тұрақсыз, берекесіз. ә) Біреудің жынын қағып алатын өткір деген мағынада. Сайтан мінез. Ұшқалақ, жеңілтек мінез. Сайтанның сапалағы. жергілікті сөз. Ой, жексұрын, берекесіз деген мағынада айтылатын сөз. Сайтанның сапалағындай. Күтпеген жағдайда, кенеттен. Сайтанын қақты [ басты ]. Бетін қайтарды, жынын басты, жуасытты, желігін тыйды. Сайтаны ұстады. Жыны қозды, ызаланды, ашуы келді. Сайтаны шатастырды. Қырсық шалды, жаза басты, ағаттық жасады.