КӨСІЛТ
= етістік. 1. Аяқтарын созу, көсу. 2. Құйғыта шабу, жосылту. 3. ауыспалы мағына. Құлашын кең жаздыру, қарқындату, шабыттана шалқи түсу, барынша еркін қимылдау. 4. ауыспалы мағына. Шарықтату, шабыттандыру, жігерлендіру, қанаттандыру, рух беру. 5. ауыспалы мағына. Желдей есіп сөйлеу, кеңінен толғау. Көсілте жазды. Бүгешігесін қалдырмай жазды. Көсілте жазылды. Көстите, сойдақтата жазылды. Көсілте жеді. Көп жеді, обырлана соқты, жұтты. Көсілте жорғалатты. Тайпалта, тізгінін тежемей жорғалатты. Көсілте көсіпкөсіп жіберді. Көсеуін бойлата салды, қозғап-қозғап қойды. Көсілте қуды. Тым-тырақай қуды. Көсілте созды. Серейте созды, созылды. Көсілте соқты. Құлаштай соқты, аямай ұрды. Көсілте сілтеді. Құлаштай сілтеді, өндірте қимылдады, қарыштады. Көсілте тартты. Келістіре соқты, аямай салып жіберді, оңдырмай ұрды. Көсілте шапты. Ат басын ірікпей, ағыза шапты. Көсілте шерту. Домбыраны еркінше шерту, құйқылжыта тарту. Көсілтіп айдады. Жосылтып айдады, сар желдірді. Көсілтіп айтты. Майын тамызып айтты; таратып, баппен айтты. Көсілтіп алды. а) Ат басын қоя берді, желе жортып алды. ә) Шабытына мінді, көңілі тасыды. Көсілтіп барады. а) Ызғытып, сар желдіріп, жосылтып барады. ә) Екпіндей түсті, шабыттана сөйледі. Көсілтіп жүзді. Заулатып, барынша ағындады. Көсілтіп жіберді. Еркіне жіберді, тежемеді. Көсілтіп кетті. а) Құстай ұшырып, зымыратып кетті. ә) Құйқылжыта тартты. Көсілтіп шырқады. Әнді тамылжыта, нәшіне келтіре айтты.