ОРАМАЛ
1омоним [ ир. ] зат есім. 1. этнографиялық. Әртүрлі матадан шаршы, үшбұрыш етіп тігілген, әйел, қыз бала басына тартатын жаулық. 2. этнографиялық. Әйел, келін екенін білдіру үшін тартатын жаулық. 3. Енсіз матадан ұзынша етіп жасалған сүлгі. 4. Беторамал. 5. жергілікті сөз. Қызыл орамал, қыздар ғана басына тартатын орамал. 6. этнографиялық. Көрсеткен сыйсияпат, базарлық деген мағынада. Орамал аудару. жергілікті сөз. Келін боп түскен қыздың қызыл орамалын алып, оның орнына бүркеншік жабу салты. Орамал жүгіртпек. жергілікті сөз. ойын. Тізенің астына орамал жүгіртіп ойнайтын ойын. Орамал кепкенше. Реніштің, наланың тез қайтуы, тез басылу туралы. Орамал салды. этнографиялық. Келін болып түскен бойжеткеннің басына орамал жапты. Орамал сыйлады. Қыз өзі ұнатқан жігітіне кестелеген орамал сыйлап, сезімін білдірді. Орамал тартты. этнографиялық. а) Әйел, қыз бала басына орамал салды, байлады. ә) Келін болып түсті, біреуге әйел болды. Орамал тастады. ойын. Орамал тастап ойнайтын жастар ойыны кезінде ойыншы орамалды қалаған адамының алдына қойды. Орамалын бұлғады. Қыз бала алысқа ұзаған адамға “хош” айтып, орамалын көтеріп, бұлғады.