Толковый словарь казахского языка: ТІРІ

|ТІРІ #сын есім. 1. Жаны бар, тіршілік етуші. 2. Өмірде бар, өмір сүріп жүрген. Тірі азап [ қорлық ]. Қиямет-қайым, мехнат. Тірі аруақ. а) Өлген адам тәріздi құр сүлдесi қалған, бейбақ. ә) Дәрменсіз адам мағынасында айтылады. Тiрi әруақ. #сөйлеу. Тiрi аруақ. Тірі бол! аман-есен, сау-саламат жүр! Тірі бейіт. Көзі тірісінде орны белгіленіп, тұрғызылған бейіт. Тірі еткенді құр етпеді. #діни. Жан бергенді құр тастамады, ризығын берді. Тірі жан [ пенде ]. Адам баласы, адамзат, кісі. Тірі жанға көрінбеді. Ешкімнің көзіне түспеді. Тірі жанға теңдік бермеді [ берген жоқ ]. Ешкімге есесін жібермеді. Тірі жан жоқ. Ешкім, ешбір адам жоқ. Тірі жаннан қаймықпады. Ешкімнен қорықпады. Тірі жан тісті бақа. Әйтеуір талпынып, ұмтылып жатыр деген мағынада. Тірі жесір. Күйеуі ұзақ сапарға кеткен не ажырасып кеткен әйел. Тірі жетім. а) Әкешешесінен жастай айырылған бала. ә) Желіндемей төлдеген қойдың қозысы. Тірі жүн. қойшар. Қойдың қалың болып ұйысқан қысқы жүнінің астынан жаз шыға жаңадан шыққан және сол ұйысқан жүнінің көтеріліп қырқылғаннан кейін шығып келе жатқан жүні. Тірі заттек. Биосферадағы тірі организмдердің жиынтығы және биомассасы. Тірі кесір болды. Арылмастай қырсыққа айналды, пәле болды. Тірі кетпейді. Аман жібермейді. Тірі күйік болды. Тірідей қайғы-қасірет шектірді, уайым болды. Тірі күйік тартқызды. Тірідей қайғы-қасірет шектірді. Тірі күн. #поэтикалық. Жақсы тұрмыс, бейбіт өмір. Тірі қалды. Өлмеді, ажал аузынан қалды. Тірі масқара. Нағыз сорақы, барып тұрған оңбағандық. Тірі өлік. Құр сүлдесі қалған, жансыз бейне; қолынан түк келмейтін дәрменсіз, қауқарсыз адам. Тірі өліктей. Қауқарсыз, дәрменсіз адам. Тірі пенде. а) Жарық дүниеде өмір сүруші, тіршілік етуші адам. ә) Қыбыр еткен, қит еткен жан; ешкім. Тірі сөз. Жанға нәр, қуат берер, иландырар, шипа болар жанды сөз.
|ТІРІ тірі дән. Диірменнен бітеу шыққан дән.

© 2021. Wonder Words
Институт интеллектуальных технологий