Толковый словарь казахского языка: САЛЫҚ

|САЛЫҚ 1#омоним #зат есім. #экономикалық. Жеке адам мен кәсіпорындардан міндетті түрде алынатын мемлекеттік алым. Салық агенті [ инспекторы ]. #экономикалық. Салық заңнамасына сәйкес төлем көздерінен ұсталатын салықтарды есептеу, ұстау және аудару міндеті жүктелген заңды тұлға, жеке кәсіпкер. Салық базасы. #экономикалық. Салықтар мен бюджетке төленуге тиіс басқа да міндетті төлемдердің сомасы анықталатын салық салу объектісі мен салық салуға байланысты объектінің құндық, заттық немесе өзге де сипаттамасы. Салық берешегі. #экономикалық. Бересі сомасы; сондай-ақ өсімпұлдар мен айыппұлдардың төленбеген сомасы. Салық есептемесі. #экономикалық. Салық төлеуші салық органдарына табыс ететін салық міндеттемелерін есептеу туралы ақпараттан тұратын құжаттама. Салық ескертпесі. #экономикалық. Сыртқы экономикалық өзара шарттарды, қызметтер көрсету туралы шарттарды, несие келісімдерін жасасу кезіндегі заңды талаптар. Салық жеңілдіктері. #экономикалық. Заңнамаға сәйкес салық төлеушілерді салықтан толық немесе ішінара босату. Салық жүйесі. #экономикалық. Алынатын салықтар мен басқа да міндетті төлемдер түрлерінің, олардың құрылымы, нысандары мен әдістерінің, салық қатынастарын реттейтін салық қызметі органдарының жиынтығы. Салық заңнамасы. #экономикалық. Салық салу және жинауға қатысты қоғамдық қатынастарды реттейтін нормативтік құқықтық актілердің жиынтық атауы. Салық кодексі. #экономикалық. Мемлекеттік және жергілікті өзін-өзі басқару органдарының салық төлеушілермен салықтық қатынастарын реттейтін мемлекеттің жоғарғы билігі деңгейінде қабылдаған заңнамалық нормалардың негізгі жиынтығы. Салық көзі. #экономикалық. Салық төлеу үшін пайдаланылатын резерв. Салық қолшатыры [ бүркеніші ]. #экономикалық. Ағымдағы және болашақтағы табыстарды салық салудан қорғау үшін осы табыстарды залалдың шамасына азайту арқылы өткендегі есепті кезеңнің залалына ілгері көшіру. Салық құқығы. #экономикалық. Мемлекет салықтарының түрлерін анықтайтын, салық құрылымын, оларды өндіріп алу тәртібін белгілейтін және салық міндеттемелерінің пайда болуына, өзгеруіне және тоқтатылуына байланысты қатынастарды реттейтін құқықтық нормалардың жиынтығы; қаржы құқығының институты. Салық қызметі. #экономикалық. Уәкілетті мемлекеттік органдар мен салық органдарынан құралатын органдардың жиынтығы. Салық мағлұмдамасы [ декларациясы ]. #экономикалық. Салық төлеушінің, салық агентінің Салық кодексінде белгіленген тәртіпке сәйкес салық органдарына берілген жазбаша мәлімдемесі немесе электрондық құжаты. Салық мөлшерлемесі. #экономикалық. Салық базасының өлшем бірлігіне шаққандағы салық есептеулерінің шамасы. Салық міндеттемесі. #экономикалық. Салық төлеушінің салық заңнамасына сәйкес мемлекет алдында туындаған міндеттемесі; оған сәйкес салық төлеуші салық органына тіркеу есебіне тұруға, салық салу объектілері мен салық салуға байланысты объектілерді анықтауға, салық және бюджетке төленетін басқа да міндетті төлемдерді есептеуге, салық есептемесін жасауға, оны белгіленген мерзімде тапсыруға міндетті. Салық патенті. #экономикалық. Арнаулы салық режімін қолдану құқығын куәландыратын және салық сомасының бюджетке төленуі фактісін растайтын құжат. Салықпен реттеу. #экономикалық. Салық салудың жалпы деңгейін төмендету немесе көтеру есебінен бюджетке алу нормасын өзгерту арқылы өндірісті дамытуға мемлекеттің жанама ықпал жасау шараларының жиынтығы. Салық салды. Алым алатын болды. Салық салу қағидаттары. #экономикалық. Салық заңдары негізделетін қағидаттар. Салық салу объектісі. #экономикалық. Белгілі бір салық өндіріп алынатын мүлік, мәміле немесе мүліктік #құқықтық. Салық салу өлшемі. #экономикалық. Салық базасын сандық тұрғыдан көрсетуге пайдаланылатын салық салу ауқымының өлшемі. Салық салынбайтын табыс. #экономикалық. Бюджеттің салықпен байланыспайтын санаты. Салық санкциялары. #экономикалық. Салық салу туралы қолданылып жүрген заңдарды сақтамайтын салық төлеушілер мен лауазымды адамдарға салық органдарының мемлекеттік экономикалық және әкімшілік жолмен ықпал ету құралы. Салық саясаты. #экономикалық. Мемлекеттің экономикалық саясатының бір бөлігі [ Салық негізін, мөлшерлемесін, жеңілдіктерін және шегерімдерін өзгерту жолымен іске асырылады ]. Салық тетігі. #экономикалық. Мемлекет заң шығарушылық жолмен белгілейтін салық салу ережелерінің жиынтығы. Салық төлеуден жалтару. #заң. Салық төлеушінің салық салу объектісін (пайданы, табысты, тауар айналымы мен мүлікті, т.б.) әдейі жасыруы және азайтуы. Салық төлеуші. #экономикалық. Салықтарды және бюджетке төленетін басқа да міндетті төлемдерді төлеуші тұлға. Салық төлеушінің тіркелу нөмірі. #экономикалық. Барлық жеке тұлғаға, заңды тұлғаға, белгілі бір жағдайда ел аумағында табыс алатын шетелдік өкілдіктер мен филиалдарға берілетін нөмір.
|САЛЫҚ 2#омоним #зат есім. #көнерген сөз. 1. Шаршау, зорығу, әбден титықтау. 2. Талықсу. 3. Ұйып қалу.

© 2021. Wonder Words
Институт интеллектуальных технологий