Қазақ тілінің түсіндірмелік сөздігі: САНДЫҚ

Сөз: Қазақ тілі Орыс тілі Ағылшын тілі Іздеу

|САНДЫҚ 1#омоним #зат есім. #этнографиялық. 1. Киім-кешек, үй тұрмысына қажет заттар салуға арналған, сырты әртүрлі бояумен сырланып, айшықты қаңылтырмен өрнектеліп, өрнекті сүйекпен қапталған, ағаштан я темірден жасалған, екі бүйірінде тұтқасы, құлыпты қақпағы бар топсалы текше түріндегі үй жиһазы. 2. #ауыспалы мағына. Жыр қазынасы, өнер қазынасы. 3. Дүние, мүлік, жиған-терген. 4. #ауыспалы мағына. Ақыл, ой қазынасы. Сандық ашу. #этнографиялық. Жасы келген, үлкен адам қайтыс болғанда жетісіне дейін сандығына жиғантергенін, киімкешегін жақын туыстарына үлестіріп беретін ғұрып. Сандық шомбал шолпы. #этнографиялық. зергерлік. Шолпының төрткіл, салмақты түрі.
|САНДЫҚ 2#омоним #сын есім. Санға қатысты, санмен байланысты. Сандық анализ. #химиялық. Сандық талдау, аналитикалық химияның зат құрамындағы жеке бөліктердің сандық қатынасын анықтайтын әдістер жөніндегі бір саласы. Сандық масштаб. #әскери сөз. Алымы бірге тең, бөлімі картада жергілікті жер сызығының ұзындығы қанша ретке кішірейгенін көрсететін бөлшек түріндегі масштаб. Сандық бағдарламалық құрылғы. #информатикалық. Адамдар немесе есептегіш мәшинелер дайындап берген бағдарлама негізінде құралжабдықтарды (металл кесетін станоктарды, өңдеуші орталықтарды, роботтық манипуляторларды, икемді өндірістік модульдерді және тағы басқа.) басқару сигналдарын өндіруге арналған құрылғы. Сандық тәсіл. Сандарға элементар операцияларды шекті рет қолдана отырып, математикалық есептері жуық түрде шығару тәсілі. Сандық фотосурет [ фотография ]. Графикалық түрлендіру және шығару мақсатында бейнені (мыс., фотосуретті) сандық түрде сақтау әдісі. Сандық шектеулер. #әскери сөз. Белгілеген категориядағы қару-жарақ жүйесінің санына қойылатын шектеулер. Сандық талдау. #химиялық. Үлгідегі химиялық элементтердің, атомдар топтамасының немесе құрылымдарының мөлшерін анықтайтын талдау әдісі.